काठमाडौँ । क्यानडाले ट्राभल एडभाइजरी जारी गर्दै भारत भ्रमण गर्दा अत्यधिक सावधानी अपनाउन आफ्ना नागरिकहरुलाई आग्रह गरेको छ । पछिल्लो समय क्यानडा र भारतसँग तनाव बढिरहेका बेला क्यानडाले आफ्ना नागरिकहरुलाई त्यस्तो आग्रह गरेको हो ।
यही मंगलबार जारी गरेको ट्राभल एडभाइजरीमा क्यानडाले भारतको जम्मु कश्मिरमा आतंकवाद, उग्रवाद, अशान्ति र अपहरणको खतरा रहेको उल्लेख गरिएको छ । साथै क्यानडाले भारतका गुजरात, पन्जाब, राजस्थान र पाकिस्तानसँग सिमाना जोडिएका अन्य क्षेत्रमा नजान पनि आफ्ना नागरिकहरुलाई आग्रह गरेको छ ।
गत जुन महिनामा क्यानडाको ब्रिटिश कोलम्बिया क्षेत्रमा शिख समुदायका नेता हरदीप सिंह निज्जरको हत्या भारतीय एजेन्टले गरेको भनी गत सोमबार क्यानडाका प्रधानमन्त्री जस्टिन ट्रुडोले अभिव्यक्ति दिएका थिए ।
प्रधानमन्त्री ट्रुडोको सो अभिव्यक्ति लगत्तै क्यानडाले सोही आरोपमा भारतका एक जना कूटनीतिज्ञलाई देश निकाला गरेको पछि र भारतले समेत क्यानडाका एक कूटनीतिज्ञलाई पाँच दिनभित्र देश छाड्न निर्देशन दिए पछि क्यानडा र भारतबीचको तित्ताता अहिले बढिरहेको छ ।
