काठमाडौं । इरानमा नयाँ राष्ट्रपति चयनका लागि २८ जुनमा निर्वाचन हुने भएको छ । राष्ट्रपति इब्राहिम रायसीको गत आइतबार हेलिकप्टर दुर्घटनामा निधन भएपछि इरानमा नयाँ राष्ट्रपति चयनका लागि निर्वाचन हुन लागेको हो ।
अजरबैजानबाट तबरिज सहरतर्फ गइरहेका बेला राष्ट्रपति रायसी, विदेशमन्त्री हुसेन अमिर अब्दुल्लाहियानसहित ६ जना सवार हेलिकप्टर दुर्घटना भएको थियो ।
दुर्घटनामा हेलिकप्टरमा सवार सबैको मृत्यु भएको थियो । उक्त घटना पछि इरानी सरकारले पाँच दिनको राष्ट्रिय शोक घोषणा गरेको छ ।
राष्ट्रपति इब्राहिम रायसीको मृत्यु पछि इरानका उपराष्ट्रपति मोहम्मद मोख्बेरलाई कार्यवाहक राष्ट्रपतिको रुपमा जिम्मेवारी दिईएको छ ।
साथै उपविदेशमन्त्री अली बगेरी कानीलाई कार्यवाहक विदेशमन्त्रीको रुपमा नियुक्त गरिएको छ ।
