काठमाडौँ । नेपाली कांग्रेसका वरिष्ठ नेता पूर्णबहादुर खड्काले हालैको निर्वाचन परिणामलाई मतदाताले दिएको गम्भीर सन्देशका रूपमा लिनुपर्ने बताएका छन्। उनले सामाजिक सञ्जालमार्फत आफ्नो धारणा सार्वजनिक गर्दै पार्टीका नेता तथा कार्यकर्ताहरूलाई आत्मचिन्तन गर्न र संयमित एवं जिम्मेवार बन्न आग्रह गरेका छन्।
खड्काले निर्वाचनको नतिजालाई केवल हार–जितको अंकगणित मात्र नभई जनताले दिएको संकेतका रूपमा बुझ्नुपर्ने बताएका छन्। उनका अनुसार अहिलेको अवस्था पार्टीभित्र गहिरो समीक्षा गर्ने र भविष्यका लागि बाटो सच्याउने अवसर पनि हो।
“निर्वाचनको परिणामले हामीलाई गम्भीर सन्देश दिएको छ। अब आवेग, उत्तेजना र बदलाको भावनाबाट मुक्त भएर अत्यन्त संयम र जिम्मेवार बन्नुपर्ने समय आएको छ,” उनले उल्लेख गरेका छन्।
उनले नेता तथा कार्यकर्ताहरूलाई ‘म–म’ को सोच त्यागेर सामूहिक हितलाई प्राथमिकता दिन आग्रह गरेका छन्। व्यक्तिगत महत्त्वाकांक्षा र आग्रहभन्दा माथि उठेर पार्टीको बृहत् एकताका लागि काम गर्नुपर्ने उनले बताएका छन्।
“अस्वाभाविक महत्त्वाकांक्षा र व्यक्तिगत आग्रहबाट माथि उठेर पार्टीको बृहत् एकताका लागि निष्ठापूर्वक अगाडि बढ्नु नै हाम्रो नैतिक कर्तव्य हो,” खड्काले भनेका छन्।
उनको भनाइले निर्वाचनपछि पार्टीभित्र सुरु भएको आत्ममूल्यांकनको बहसलाई थप बल दिएको छ। कांग्रेसभित्र अहिले संगठन सुदृढीकरण, नेतृत्वको भूमिका र जनतासँगको सम्बन्धलाई कसरी अझ मजबुत बनाउने भन्ने विषयमा छलफल चलिरहेको छ।
राजनीतिक वृत्तमा खड्काको सन्देशलाई भावनात्मक र आत्ममूल्यांकनतर्फ केन्द्रित अभिव्यक्तिका रूपमा हेरिएको छ, जसले पार्टीलाई आगामी दिनमा थप एकताबद्ध भएर अघि बढ्न प्रेरणा दिन सक्ने अपेक्षा गरिएको छ।
