काठमाडौँ । गैरआवासीय नेपाली संघ (एनआरएनए) को नयाँ नेतृत्व चयन प्रक्रियामा सहमति जुटेसँगै डा. हेमराज शर्माको अध्यक्षतामा नयाँ कार्यसमिति निर्विरोध निर्वाचित भएको छ। संघभित्रको आन्तरिक एकतालाई जोड दिँदै सबै पदाधिकारीहरू सर्वसम्मत चयन गरिएका हुन्। लामो समयको छलफल र रस्साकस्सीपछि बनेको यो नयाँ टोलीलाई ‘एकताको जम्बो टिम’ का रूपमा हेरिएको छ, जसमा झण्डै सयको हाराहारीमा पदाधिकारी र सदस्यहरू अटाएका छन्।
नयाँ कार्यसमितिको वरिष्ठ उपाध्यक्षमा रविन शेरचन चयन भएका छन् भने उपाध्यक्षहरूको संख्या निकै ठूलो राखिएको छ। जसमा रामशरण सिंखडा, खगेन्द्र न्यौपाने, मनोज कुमार श्रेष्ठ, रोजिना प्रधान राई, रोशन थापा, प्रविण गुरुङ, बुद्धि सुवेदी र चिन्तामणि सापकोटासहित २३ जना उपाध्यक्ष रहेका छन्। संघलाई समावेशी बनाउने र सबै पक्षलाई समेट्ने प्रयासस्वरूप उपाध्यक्षहरूको संख्यामा उल्लेख्य वृद्धि गरिएको हो।
संघको प्रशासनिक बागडोर सम्हाल्ने महासचिव पदमा डा. चिरञ्जीवी खड्का चयन भएका छन्। त्यस्तै, उपमहासचिवमा अनुजा प्रधान, वेदराज बस्नेत, दिनेश कुमार घिमिरे, पारसमणि पोख्रेल, राजेन्द्र अर्याल र स्वतन्त्र प्रताप शाह निर्विरोध भएका छन्। सचिवको जिम्मेवारी अभिमन्यु बस्नेत, दिपेश खत्री, मदनराज पौडेल, माधव दुलाल र मोहम्मद मुक्तदा मुसलमानसहित १३ जनालाई दिइएको छ। महिला सचिवमा भने अमृता थापा कञ्चन चयन भएकी छन्।
आर्थिक व्यवस्थापनको जिम्मेवारी कोषाध्यक्षमा कृष्णप्रसाद तिम्सिनालाई सुम्पिएको छ। सह-कोषाध्यक्षमा अब्दुल बासिद र विमल सुवेदी तथा महिला सह-कोषाध्यक्षमा गंगा खतिवडा चुनिएका छन्। संघको प्रवक्ताको जिम्मेवारी सोम सापकोटाले पाएका छन्। महिला संयोजकमा रश्मि थापा र युवा संयोजकमा नविन निउरे चयन हुँदा दोस्रो पुस्ताका नेपालीहरूलाई जोड्ने उद्देश्यले दीपमाला ढकाललाई दोस्रो पुस्ता संयोजक बनाइएको छ।
क्षेत्रीय संयोजकतर्फ अफ्रिकामा मनोज विक, अमेरिकामा भुवन खरेल, एसिया प्यासिफिकमा दिपक प्रसाद कडेल, युरोपमा रोबर्ट लिम्बु, मध्यपूर्वमा रमेश श्रेष्ठ र ओसेनियामा रमेश जोशीले नेतृत्व पाएका छन्। विश्वभरका विभिन्न क्षेत्रमा उप-संयोजक र महिला तथा युवा संयोजकहरूको पनि ठूलो टोली घोषणा गरिएको छ। निर्वाचनको सट्टा सहमतिको बाटो रोजिएकाले यसपटक एनआरएनएभित्रको विवाद मत्थर हुने र प्रवासमा रहेका नेपालीहरूको हकहितमा एकीकृत ढंगले काम हुने अपेक्षा गरिएको छ।
