काठमाडौं । इन्डोनेसियाको पूर्वी जाभा प्रान्त स्थित कान्जरुहान स्टेडियममा दुई फुटवल टोलबिच खेलको क्रममा शनिबार भएको भिडन्त र भागदौंडमा परी कम्तिमा पनि १२९ जनाको मृत्यु भएको छ भने करिव २०० जना घाईते भएका छन् ।
अरेमा एफसी र पर्सेबाया सुराबाया फुटवल टोली बिच चलिरहेको खेलमा अरेमा टोलीले हारेपछि सो टोलीका फ्यानहरु आक्रोशित भएर मैदानमा आएका कारण भड्किएको भिडन्त र भागदौडमा परी दुई प्रहरी सहित १२९ जनाको मृत्यु भएको त्यहाँको प्रहरीले पुष्टी गरेको छ ।
समाचार एजेन्सीहरुका अनुसार ३४ जनाको रंगशालामा र बाँकीको अस्पतालमा उपचारको क्रममा मृत्यु भएको हो । घाईतेहरु मध्ये केहीको अवस्था गम्भिर रहेका कारण मृत्यु हुनेहरुको संख्या बढ्न सक्ने आशंका गरिएको छ ।
इन्डोनेसियाको फुटबल संघ (पिएसएसआई) ले एक बिज्ञप्ती जारी गर्दै घटनाप्रति दुःख व्यक्त गरेको छ । साथै पिएसएसआइले अरेमाका समर्थकहरूका कारण घटना घटेको भन्दै छानबिनको माग समेत गरेको छ ।
