काठमाडौँ । लामो समयदेखि जारी तनावपूर्ण सैन्य द्वन्द्वपछि अमेरिकी राष्ट्रपति डोनाल्ड ट्रम्पले इरानबाट आफ्ना सैनिक फिर्ता गर्ने संकेत दिएका छन्। ओभल अफिसमा बोल्दै ट्रम्पले आगामी दुईदेखि तीन हप्ताभित्र अमेरिकी सेना फिर्ता हुने तयारीमा रहेको जानकारी दिएका हुन्।
ट्रम्पको यो घोषणासँगै मध्यपूर्वमा मडारिएको युद्धको कालो बादल हट्ने र शान्ति स्थापना हुने अपेक्षा गरिएको छ। इरानमा अमेरिकी सैन्य लक्ष्य पूरा भइसकेको दाबी गर्दै उनले थप द्वन्द्व लम्ब्याउन आवश्यक नरहेको बताएका छन्। यद्यपि, पूर्ण युद्धविरामअघि इरानसँग नयाँ राजनीतिक समझदारी वा ‘डिल’ हुन सक्ने सम्भावनालाई उनले खुला राखेका छन्।
शान्तिका लागि इरान पनि सकारात्मक
अमेरिकाभित्रै युद्ध रोक्न दबाब बढिरहेका बेला इरानी राष्ट्रपति मसुद पेजेस्कियानले पनि सकारात्मक प्रतिक्रिया दिएका छन्। तेहरान युद्ध अन्त्यका लागि तयार रहेको उल्लेख गर्दै उनले फेरि द्वन्द्व नचर्किने ग्यारेन्टी भएमा इरान पछि हट्न तयार रहेको स्पष्ट पारेका छन्।
अन्योलमा इजरायल
अमेरिकी राष्ट्रपतिले सेना फिर्तीको घोषणा गरे तापनि इजरायलको अडान भने अझै कठोर देखिएको छ। इजरायली प्रधानमन्त्री बेन्जामिन नेतन्याहुले हालसम्म युद्ध अन्त्यका लागि कुनै निश्चित ‘डेडलाइन’ तोकेका छैनन्। उनले इरानसँगको संघर्ष कहिले टुंगिन्छ भन्ने विषयमा अहिले नै केही भन्न नसकिने प्रतिक्रिया दिएका छन्।
खामेनीको मृत्यु र क्षेत्रीय सुरक्षाको चुनौती
गत फेब्रुअरीको अन्तिम साता अमेरिका र इजरायलले गरेको संयुक्त आक्रमणमा इरानका सर्वोच्च नेता अली खामेनी मारिएपछि क्षेत्रको शक्ति सन्तुलन बदलिएको छ। खामेनीका छोरा मोज्तबा खामेनीलाई नयाँ सर्वोच्च नेता बनाइएको खबर आए पनि उनी हाल भूमिगत रहेका छन्।
खामेनीको मृत्युपछि इरानले खाडी मुलुकमा रहेका अमेरिकी सैन्य अड्डा र ऊर्जा पूर्वाधारहरूमा निरन्तर आक्रमण जारी राखेको छ। यसले गर्दा विश्वभरको इन्धन आपूर्ति शृङ्खलामा गम्भीर असर पुगिरहेको छ।
