काठमाडौं । भारतको नयाँदिल्लीमा आयोजित जी २० सम्मेलनले भारत मध्यपूर्व युरोप आर्थिक करिडोरको घोषणासहित नयाँदिल्ली लिडर्स घोषणापत्र जारी गरेको छ ।
भारतीय प्रधानमन्त्री नरेन्द्र मोदीले भारत, मध्यपूर्व र युरोपलाई जोड्ने आर्थिक करिडोरको घोषणा गरेका हुन् । आर्थिक करिडोरको घोषणा गर्दै मोदीले यस करिडोरले पूरै विश्वलाई कनेक्टिभिटीको माध्यमबाट विकासको लागि दिगो बाटो देखाउने बताएका थिए ।
यस आर्थिक करिडोर अन्तर्गत सन्चार र भौतिक पूर्वाधारका काम हुने बताउदै भारतीय प्रधानमन्त्री मोदीले यसअन्तर्गत निर्माण हुने रेलवे मार्गले भारत र युरोपबीचको व्यापार सहज र छिटो बनाउने अपेक्षा व्यक्त गरे ।
अनेकन आशंकाकाबीच अमेरिकी राष्ट्रपति जो बाइडन, साउदी अरबका क्राउन प्रिन्स मोहम्मद बिन सलमान र युरोपियन कमिसनका प्रमुख उर्सला वान डेर लियेनको उपस्थितिमा गरिएको यस घोषणाले चीनले अघि सारेको बेल्ट रोड ईनिसियटिभ (बीआरआई) परियोजनालाई चुनौती दिने ठानिएको छ ।
विश्वका शक्तिशाली अर्थतन्त्र भएका देशहरुको समूहको रुपमा रहेको यस जी २० मा अफ्रिकन युनियनलाई सदस्यता प्रदान गर्ने निर्णयपनि सम्मेलनले गरेको छ । यसअघि जी २० मा १९ देश र एक युरोपेली युनियनगरी १९ सदस्य थिए । अफ्रिकन युनियन थपिएपछि अब जी २० १९ देश र दुई युनियन गरी २१ सदस्यीय भएको छ ।
जी २० मा अमेरिका, क्यानडा, बेलायत, चीन, फ्रान्स, जर्मनी, भारत, अस्ट्रेलिया, ब्राजिल, इन्डोनेसिया, इटली, जापान, दक्षिण कोरिया, मेक्सिको, रुस, साउदी अरब, दक्षिण अफ्रिका, टर्की र अर्जेन्टिना रसदस्य छन् ।
