जर्जिया अमेरिका । अमेरिकाको जर्जिया राज्यको एक विद्यालयमा गोली चल्दा दुई शिक्षक र दुई विद्यार्थीगरी चार जनाको मृत्यु भएको छ । उक्त घटनामा ८ विद्यार्थी र एक शिक्षक गरी ९ जना घाइते भएका छन् ।
अन्तराष्ट्रिय समाचार संस्थाका अनुसार एटलान्टाको लगभग ८० किलोमिटर उत्तरपूर्वमा रहेको ब्यारो काउन्टीको अपलाची हाई स्कूलमा सोही स्कूलका १४ वर्षीय एक बालकले गोली चलाएका थिए । गोली चलाउने विद्यार्थीलाई प्रहरीले पक्राउ गरेको जनाईएको छ ।
अमेरिकामा विद्यालयमा समेत गोली चल्ने घटना सामान्य जस्तै भएका छन् । सन् २०२४ मा मात्रै अमेरिकाको विद्यालयमा गोली चलेको यो ४५औँ घटना भएको अन्तराष्ट्रिय समाचार संस्थाहरुले जनाएका छन् ।
