काठमाडौँ । इरानमा विकसित पछिल्लो राजनीतिक तथा सामाजिक अस्थिरताका कारण नेपाल सरकारले त्यहाँ रहेका र इरान जाने तयारीमा रहेका नेपाली नागरिकहरूका लागि विशेष ‘ट्राभल एड्भाइजरी’ जारी गरेको छ। परराष्ट्र मन्त्रालयका अनुसार इरानको सुरक्षा अवस्था जटिल बन्दै गएकाले अर्को सूचना जारी नहुन्जेलसम्म नेपाली नागरिकलाई इरान यात्रा नगर्न अनुरोध गरिएको छ। साथै, रोजगारी वा अन्य कारणले हाल इरानमै रहेका नेपालीहरूलाई पनि सम्भव भएसम्म छिटो र सुरक्षित माध्यम अपनाएर स्वदेश फर्कन वा सुरक्षित स्थानतर्फ जान सुझाव दिइएको छ।
मन्त्रालयले इरानमा बसिरहनै पर्ने अवस्थामा रहेका नेपालीलाई विशेष सतर्कता अपनाउन आग्रह गर्दै प्रदर्शन भइरहेका क्षेत्र, भीडभाड र संवेदनशील स्थानहरूमा नजान सचेत गराएको छ। स्थानीय सुरक्षा निकायले जारी गरेका सूचनाहरूमा ध्यान दिन र आपतकालीन अवस्थाका लागि आफ्ना आवश्यक कागजातहरू सधैँ साथमा राख्न समेत मन्त्रालयले निर्देशन दिएको छ। इरानमा नेपालको स्थायी दूतावास नभएकाले त्यहाँ रहेका नेपालीहरूको कूटनीतिक समन्वय दोहास्थित नेपाली दूतावासमार्फत भइरहेको छ। त्यसैले, कुनै पनि आपतकालीन सहयोग वा उद्धारका लागि दोहास्थित दूतावास वा काठमाडौँस्थित परराष्ट्र मन्त्रालयमा सम्पर्क गर्न आग्रह गरिएको छ।
इरानमा गत डिसेम्बर २८ देखि बढ्दो महँगी, उच्च मुद्रास्फीति र बेरोजगारी लगायतका आर्थिक मुद्दालाई लिएर सरकार विरुद्ध देशव्यापी प्रदर्शन भइरहेका छन्। कतिपय स्थानमा यी प्रदर्शनहरू हिंसात्मक बनेका र सुरक्षाकर्मीसँगको झडपमा मानवीय क्षति समेत भएको अन्तर्राष्ट्रिय सञ्चारमाध्यमहरूले जनाएका छन्। मध्यपूर्वको समग्र सुरक्षा अवस्था र विदेशी नागरिकमाथि पर्न सक्ने सम्भावित जोखिमको मूल्याङ्कन गर्दै नेपाल सरकारले पूर्वसतर्कताका रूपमा यो जानकारी सार्वजनिक गरेको हो।
