काठमडौँ। सम्भावित नयाँ सरकार गठनको चर्चा चुलिएसँगै मुलुकको आगामी आर्थिक नीतिको दिशा कस्तो हुने भन्ने विषयमा व्यापक बहस सुरु भएको छ। यसै सन्दर्भमा राष्ट्रिय स्वतन्त्र पार्टी (रास्वपा) बाट सम्भावित अर्थमन्त्रीका रूपमा हेरिएका विशिष्ट अर्थशास्त्री तथा सांसद डा. स्वर्णिम वाग्लेले केही मन्त्रालयका सचिवहरूलाई फोन गरी दीर्घकालीन प्रभाव पार्ने प्रकृतिका निर्णयहरू हतारमा नगर्न आग्रह गरेका छन्। यो कदमलाई प्रशासनिक र राजनीतिक वृत्तमा आगामी सत्ता समीकरण र नीतिगत परिवर्तनको प्रारम्भिक पूर्वसंकेतका रूपमा हेरिएको छ।
स्रोतका अनुसार डा. वाग्लेले निकट भविष्यमा आफ्नो पार्टीको नेतृत्वमा नयाँ सरकार बन्न सक्ने परिस्थिति औंल्याउँदै संक्रमणकालीन अवस्थामा गरिने ठूला आर्थिक तथा प्रशासनिक निर्णयले नयाँ सरकारको कार्ययोजनामा अवरोध पुर्याउन सक्ने उल्लेख गरेका थिए। उनले विशेष गरी बजेट विनियोजन, दीर्घकालीन ठेक्कापट्टा र नीतिगत प्रतिबद्धताहरूमा हतार नगर्न सुझाव दिँदै प्रशासनिक नेतृत्वलाई सचेत गराएको बुझिएको छ। नेपालको प्रशासनिक इतिहासमा सरकार परिवर्तनको समयमा ‘सेटिङ’ मा आधारित निर्णयहरू हुने र त्यसले राज्यलाई दीर्घकालीन भार पार्ने प्रवृत्तिलाई रोक्न यो रणनीतिक कदम चालिएको विश्लेषण गरिएको छ।
डा. वाग्लेले लामो समयदेखि नेपालको अर्थतन्त्रमा ‘स्ट्रक्चरल एडजस्टमेन्ट’ अर्थात् संरचनात्मक सुधारको आवश्यकता औंल्याउँदै आएका छन्। उनले प्रस्ताव गरेको ‘दोस्रो चरणको आर्थिक सुधार’ अन्तर्गत पुराना र बाधक ऐनहरूको खारेजी, डिजिटल अर्थतन्त्रको प्रवर्द्धन र राजस्व चुहावट नियन्त्रणका लागि कडा कदमहरू समावेश छन्। विशेष गरी पुँजीगत खर्च गर्ने क्षमतामा वृद्धि, असारे विकासको अन्त्य र उत्पादनमूलक उद्योगलाई प्रोत्साहन गर्ने उनको एजेन्डाले आगामी सरकारको आर्थिक मार्गचित्र तय गर्ने अपेक्षा गरिएको छ। उनले सार्वजनिक कार्यक्रमहरूमा नयाँ सरकार बनेको पहिलो १०० दिनभित्रै जनताले महसुस गर्ने गरी अर्थतन्त्रमा शल्यक्रिया गरिने दाबी समेत गर्दै आएका छन्।
प्रशासनिक तहमा गरिएको यो आग्रहले सिंहदरबारभित्र एक प्रकारको तरंग पैदा गरेको छ। विश्लेषकहरूका अनुसार, अर्थशास्त्रीय पृष्ठभूमि भएका वाग्लेले कर्मचारीतन्त्रलाई पहिल्यै विश्वासमा लिन र सम्भावित नीतिगत ‘कोर्स’ बारे जानकारी दिन खोज्नुले आगामी आर्थिक नीति निकै आक्रामक र सुधारमुखी हुने संकेत गर्दछ। यद्यपि यस विषयमा सरकारी पक्षबाट औपचारिक प्रतिक्रिया आउन बाँकी छ, तर डा. वाग्लेको यो सक्रियताले मुलुकको बिग्रँदो अर्थतन्त्र सुधार्न नयाँ सोच र ऊर्जासहितको नेतृत्व आउन लागेको सन्देश भने स्पष्ट रूपमा प्रवाह गरेको छ।
